ಸ್ನೇಹ

ಬನ್ನಿ, ಹೀಗೇ ಸುಮ್ಮನೆ

ಒಂದರೆ ಘಳಿಗೆ ಧ್ಯಾನಿಸೋಣ

ಧುತ್ತೆಂದು ಎದುರಾಗುವ

ವೈರುಧ್ಯ, ವ್ಯಥೆ, ಗೊಂದಲ,

ಯಾತನೆಗಳ ದಾಳಿಗೆ

ಬದುಕು ಮುದುಡಿ ಹೋಗುವಾಗ,

ಆಸಕ್ತಿಯಿಂದ, ಕಾಳಜಿಯಿಂದ

ಬುದ್ದಿಗೆ ವಿವೇಕ ತುಂಬಿ,

ಭಾವಾವೇಶಕ್ಕೆ ತಡೆ ಹಾಕಿ,

ಹೊಸ ಚೈತನ್ಯ ತಂದು,

ಮನಸ್ಸನ್ನು ಹಗುರಾಗಿಸಿ,

ಬದುಕ ಅರಳಿಸುವ

ಶಕ್ತಿ, ಕಲೆ ಇರುವುದು

ಸ್ನೇಹಕ್ಕೇ ಅಲ್ಲವೇ..?!

ಶಪಥ

'ಇದು ನನ್ನ ಶಪಥ'

ಅವನು ಮತ್ತೊಮ್ಮೆ ಶಪಥ ಮಾಡಿದ್ದಾನೆ;

ನೂರಾ ಎಂಟನೇ ಬಾರಿ.

ಹೊಸ ಬದುಕು ಪ್ರಾರಂಭಿಸಲು

ಹೊಸದೇನನ್ನೋ ಸಾಧಿಸಲು

ದಿನ ಕಳೆದಂತೆ, ಮತ್ತದೇ

ಹೊಂದಾಣಿಕೆಗಳು, ಸಲಹೆಗಳು;    

ಪರರ ಆದೇಶಗಳು, ಒತ್ತಾಯಗಳು

ನೂಕುತ್ತಿವೆ ನಿರಾಸೆಯ ಕಡಲಿಗೆ,    
ವಿನಾಶದ ಸುಖಕ್ಕೆ.

ಅನಿಸುತ್ತಿದೆ,
ವಿಧಿಯೂ ಶಪಥ ಮಾಡಿರಬೇಕು;

ಅವನ ವಿರುದ್ದ!!